إيناس الدغيدي والموت.. تحدثت المخرجة إيناس الدغيدي عن الموت مؤكدة إنها لا تخاف منه لكن تخشى أن تمرض، موضحة أنها تعتقد أن هناك حياة أجمل بعد الموت.
إيناس الدغيدي والموت
وقالت إيناس الدغيدي خلال لقائها في برنامج “حبر سري” من تقديم أسما إبراهيم عبر قناة “القاهرة والناس”: “مش بخاف من الموت، لما أحب حد أقوله إن شاء الله تموت وبيزعلوا، أنا عندي اعتقاد في الموت غريب محدش هيصدق، عندي اعتقاد داخلي إن في حياة بعد الموت وأنها أريح وأحلى وأنقى وروحانية جدا”.
وتابعت: “لما المخرج أستاذ بركات مات كنت واقفة مع بناته وهو بيدفن، فتحوا الصندوق لأن في الديانة المسيحية بيكونوا لابسين ملابسهم، تخيلت نفسي مكانه واتمنيت يقفلوا عليا التربة عشان ارتاح وبقيت شايفة حاجة حلوة أوي، الموت عندي شيء جميل أنا بس مش عايزة أمرض عايزة أموت على طول وبنتظر اليوم ده”.
وأكملت إيناس الدغيدي: “لما بقول لحد إن شاء الله تموت مش بيكون قصدي أشتمه، من وأنا طفلة صغيرة كنت بحلم إني بطلع بالعجلة للسما ولما يسألوني أقولهم رايحة عند ربنا وفضلت أحلم بالحلم دا كتير جدا”.
وخلال اللقاء كشفت إيناس الدغيدي عن رأيها في قيام بعض النجوم في بداياتهم بأداء مشاهد ساخنة كبوابة للشهرة، وامتناعهم عن تقديم تلك المشاهد فيما بعد.
وقالت: “كل النجوم وحتى العالميين الذين قدموا أفلام جريئة فيها مشاهد ساخنة كان عندهم شهرة ونجومية أكثر من الذين لم يقدموا هذه المشاهد”.
وأضافت: “الجمهور يحب دايما يشوف اللي مايقدرش يعمله في الحياة وهو في السينما، وبعدها ينتقد لإن عنده انفصام في الشخصية، يقول حاجة ويعمل حاجة، وخلال هذه المشاهد يحدث صمت تام في الصالة وكله مركز، ولما يخلص الفيلم تحصل دوشة ويطلبوا عرض الفيلم مرة ثانية”.
